يمة تكفين أسمعيني

يـــمـــه ..تكفين اسمعيني ...
يمـه بسألك شي ..
جاوبيني ..
هو صحيح اللي مات
داخل القبر يصير حي ...؟؟؟

يــمـــه ...اسمع أنــا صوتك ..
كل يوم اسمعه ..
وإذا حاكيتك هاوشوني ..
قالوا انسي ..
روحي يالله العبي .... !!

يمه تعالي ارجعي ...
والله خلاص بسمع كلامك ..
ما اخرب ألعابي ..
وإن قلتي يالله ..
روحي نامي ..
أروح حتى ماتزعلي ..

يمه تكفين ارجعي ..
اليوم حطت لي المديرة ..
نجمة من فوق جبهتي ..
يمه سمعتها تقول..
مسكينة هالبنت صارت يتيمة ..
قالت لها أبلة منيرة ..
مسكينه توها صغيرة ..
وش كانوا يقصدون ..؟
يمكن عشاني صرت عاقلة ..
ولا عشاني دايم اسرح



يمه مريولي توسخ ..
ماكان قصدي اوسخه ...
بس تذكرت إنك تقولي ..
بعد شهرين..
بشتري لك لبس ثاني ..
يمـه تعالي اشتري ...

يمـه عرفتي مها ..؟
صديقتي اللي معي ..
زاعلتني ..
تقول ماصرت أنا اضحّـكها ..
راحت تدور غيري ..
عشان تلقى أحد يونسهـا ...

يــمــه ..يالله خلاص لاتمزحي ..
يالله قومي ..
تعالي معي للبيت ارجعي ..

يمه يمــه ..
نسيت شي ..
بقولك ترى بيتنا صار فاضي ..
ماحد يجينا ..
وكل اللي فيه أنا واخواني ..
ليه وين اقاربنا ..؟؟
وين خالتي ..
اللي كانت تجينا ...

يمـــه قوومي يالله تعالي ..
تكفين يالله تعالي ..
ماودي ارجع لحالي ..
والله خايفة ..
ترى امس جيتك ..
مارديتي ..
حسبتك نــايمة ..

أو اقولك ..
خلاص خلاص ..
انا بجيك بكرى ..
إذا راحوا من هنا الناس ..
تكفين يمه بكرى اصحي ..
تكفين يمه بكرى ارجعي ..